महिला बालबालिका तथा जेष्ठ नागरिक मन्त्री नवल किशोर साहद्वारा महावीर मा.वि. भवन निर्माणको अवलोकन

लिलाकान्त यादव,
राजविराज, २० साउन ।
 महिला, बालबालिका तथा जेष्ठ नागरिक मन्त्री नवल किशोर साहले सप्तरीको हनुमाननगर कंकालिनी नगरपालिका–९ मा अवस्थित महावीर माध्यमिक विद्यालयमा निर्माणाधीन भवनको स्थलगत निरीक्षण गर्नुभएको छ। मन्त्री साहको विशेष पहलमा सो विद्यालयको भवन निर्माणका लागि आर्थिक वर्ष २०८१÷८२ मा ३ करोड रुपैयाँ विनियोजन गरिएको थियो भने त्यसको निरन्तरता स्वरूप आर्थिक वर्ष २०८२÷८३ मा पुनः थप ३ करोड रुपैयाँ विनियोजन गरिएको छ।
निरीक्षणको क्रममा मन्त्री साहले स्थानीय शैक्षिक पूर्वाधारको विकासले मात्र गुणस्तरीय शिक्षाको सुनिश्चितता हुने बताउँदै शिक्षा क्षेत्रमा राज्यको लगानीलाई अझ प्रभावकारी बनाउनुपर्नेमा जोड दिनुभयो। उहाँले विद्यालय व्यवस्थापन समिति, स्थानीय सरकार तथा सरोकारवाला निकायहरूसँग सहकार्य गर्दै निर्माण कार्यलाई समयमै सम्पन्न गरी विद्यार्थीहरूलाई सुरक्षित र आधुनिक वातावरणमा अध्ययन गर्ने वातावरण सुनिश्चित गर्न आग्रह गर्नुभयो।
मन्त्री साहले विद्यालय भवनको निर्माणमा भइरहेको प्रगतिप्रति सन्तोष व्यक्त गर्दै राज्यको स्रोत, साधन र नीतिलाई जनतामैत्री बनाउन वर्तमान सरकार प्रतिबद्ध रहेको धारणा राख्नुभयो। निरीक्षणका क्रममा स्थानीय जनप्रतिनिधि, विद्यालयका शिक्षक, अभिभावक र समाजका अगुवाहरूको उपस्थिति रहेको थियो।