सप्तरीमा युवकले आत्महत्या, पारिवारिक विवाद कारण भएको आशंका

लिलाकान्त यादव,
राजविराज, ११ साउन ।
सप्तरीको हनुमाननगर कंकालिनी नगरपालिका–३ पोर्ताहामा एक युवकले आत्महत्या गरेका छन्। मृतक २४ वर्षीय अरविन्द खडगाले आइतबार विहान आफ्नै घरमा झुण्डिएर ज्यान दिएका हुन्।
प्राथमिक अनुसन्धान अनुसार, युवकको आत्महत्याको कारण पारिवारिक विवाद रहेको आशंका गरिएको छ। प्रहरीका अनुसार घरमा केही समयदेखि सामान्य विवाद भइरहेकाले मानसिक तनावका कारण उनले आत्महत्या गरेको हुन सक्ने अनुमान गरिएको छ।
घटनाबारे जानकारी पाउनासाथ इलाका प्रहरी कार्यालय कंचनपुरको टोली घटनास्थलमा पुगेको थियो। प्रहरीले घटनास्थलको मुचुल्का तयार गरी मृतकको शव पोष्टमार्टमका लागि राजविराजस्थित गजेन्द्रनारायण सिंह अस्पतालमा पठाएको जनाएको छ।
मृतकका परिवारका सदस्यहरूले अरविन्द पछिल्लो समय तनावमा रहेको बताएका छन्। घटनाबारे थप अनुसन्धान भइरहेको प्रहरीले जनाएको छ।
साथै, प्रहरीले आत्महत्याको वास्तविक कारण पत्ता लगाउन परिवारका सदस्य, छिमेकी र नजिकका व्यक्तिहरूको बयान लिइरहेको छ। यस दुःखद घटनाले स्थानीय समाजमा स्तब्धता फैलिएको छ। प्रहरीले मानसिक स्वास्थ्यप्रति सचेत रहन र तनावका बेला सहयोग लिन सुझाव दिएको छ।