सप्तरीमा करेन्ट लागेर दलित दम्पतीको मृत्यु, गाउँ शोकमा

लिलाकान्त यादव,
राजविराज, १० साउन ।
सप्तरीको रूपनी गाउँपालिका–३ स्थित पौवा टोलमा शुक्रबार राति करेन्ट लागेर एक दलित दम्पतीको ज्यान गएको छ। सिटी रिक्सा चार्ज गर्ने क्रममा करेन्ट लाग्दा ४७ वर्षीय बालेश्वर खंग र उनकी ४५ वर्षीया श्रीमती रामकुमारी खंगको मृत्यु भएको जिल्ला प्रहरी कार्यालय सप्तरीले जानकारी दिएको छ।
स्थानीयवासीका अनुसार बालेश्वर खंग आफ्नो सिटी रिक्सा चार्ज गर्दै गर्दा अचानक करेन्ट लाग्यो। श्रीमान्लाई बचाउन गएकी रामकुमारीलाई समेत करेन्ट लागेपछि घटनास्थलमै दुवैको ज्यान गएको हो।
दम्पतीको मृत्युले गाउँ शोकमा डुबेको छ। मृतकका दुई छोरा छन्। एकैपटक आमाबाबुको मृत्यु भएपछि परिवारमा ठूलो बज्रपात परेको स्थानीयवासीको भनाइ छ।
रूपनी गाउँपालिका अध्यक्ष दिनेशकुमार यादवले परिवारमा परेको दुःखद घटनाले गाउँ नै स्तब्ध बनेको बताउनुभयो। उहाँले पीडित परिवारलाई आवश्यक सहयोगको पहल गरिने प्रतिबद्धता जनाउनुभयो।
प्रहरीले घटनास्थलको मुचुल्का तयार गरी शवलाई पोष्टमार्टमका लागि गजेन्द्रनारायण सिंह अस्पताल, राजविराज पठाइएको जनाएको छ।