सिरहाको लक्ष्मीपुर पतारी गाउँपालिका कार्यालयमा तालाबन्दी

ईमधेश न्यूज सम्वाददाता,
लहान, ०५ साउन ।
 सिरहा जिल्लाको लक्ष्मीपुर पतारी गाउँपालिका कार्यालयमा अनियमितताको विरोधमा तालाबन्दी गरिएको छ।
नेकपा एमाले लक्ष्मीपुर पतारी गाउँपालिका कमिटी लगायतका स्थानीय नेताहरूले गाउँपालिकामा व्यापक अनियमिता, खर्चको दुरुपयोग तथा गाडी भाडा, योजना र क्रियाकलापमा अपारदर्शिता रहेको आरोप लगाउँदै आइतवार प्रमुख प्रशासकीय अधिकृत अशोक सिंहको कार्यकक्षमा तालाबन्दी गरेका हुन्।
स्थानीय नेताहरूका अनुसार गाउँपालिकाले सूचना मागको बेवास्ता, गाडी भाडा तथा संचालन खर्चमा अनियमितता, खानेपानी तथा ट्रान्सफरमर जडानमा ढिलाइ, तथा तत्काल आवश्यकता नपर्ने समान खरिद जस्ता गतिविधिमा मनपरी गरेको छ। उनीहरूले अध्यक्ष चतुरानन्द ठाकुरलाई ध्यानाकर्षण गराउँदै कार्यशैली परिवर्तनको माग गरेका छन्।
तालाबन्दीमा सहभागी नेताहरूले गाउँपालिकाले ठोस विकासभन्दा लट्कचट्क कार्यक्रममा बढी ध्यान दिने गरेको र जनताका आवश्यकता बेवास्ता गर्दै खर्च बढाएको गुनासो पनि गरेका छन्।
तालाबन्दीपछिको अवस्था समाधान गर्न गाउँपालिकाले कुनै प्रतिक्रिया दिएको छैन। स्थानीयले पालिकाको पारदर्शिता र जवाफदेहिताका लागि चाँडो सुधारको माग गरेका छन्।