लागू औषध गोटी र गाँजासहित १ जना पक्राउ

लिलाकान्त यादव,
राजविराज, ०५ साउन ।                                                                                                                                  लागू औषधको कारोबारमा संलग्न एक व्यक्तिलाई सप्तरी प्रहरीले लागू औषधका गोटी र गाँजासहित पक्राउ गरेको छ।
राजविराज नगरपालिका–७ रंगशाला नजिक बस्ने ५३ वर्षीय नारायण बहादुर कार्कीलाई लागू औषध बिक्री वितरण गर्दै आएको सूचनाका आधारमा प्रहरीले रातीको समयमा छापा मारेको हो।
राजविराज रंगशालाको पूर्वपट्टी दर्शकका लागि बनाइएको भर्याङमुनिको जस्ताले छाएको टहरामा प्रहरीले कार्कीको घर तथा शरिर खानतलासी गर्दा Spasm Proxyvon Plus ३८२ क्याप्सुल, Nitrazepam Tablets १४९ पिस, NITRAVET-10 का १५४ गोटी, ७९ पुरिया (३११ ग्राम) गाँजा, रु. २,५०,५१० नेपाली नगद, रु. ६,३३० भारतीय नोट तथा विभिन्न कम्पनीका १३ मोबाइल सेट बरामद गरिएको हो।
पक्राउ परेका कार्कीलाई जिल्ला अदालत सप्तरीबाट म्याद थप गराई थप अनुसन्धान भइरहेको प्रहरीले जनाएको छ।
सप्तरी प्रहरीले लागू औषध कारोबारविरुद्ध निगरानी कडा बनाएको बताउँदै आउनसक्ने यस्ता अपराधमा जनसहभागिता जरुरी रहेको पनि जानकारी दिएको छ।