मन्त्री यादवको राति छड्के निरीक्षण ः मेलम्ची खानेपानी आपूर्तिमा तीव्रता

ईमधेश न्यूज सम्वाददाता,
काठमाडौँ, ०५ साउन ।
 खानेपानीमन्त्री प्रदीप यादवले उपत्यकामा मेलम्ची खानेपानी आपूर्ति प्रणालीलाई प्रभावकारी बनाउने उद्देश्यले आज राति छड्के अनुगमन गर्नुभएको छ।
मन्त्री यादवले बालुवाटारदेखि नक्साल, टुडालदेबी, विशालनगर, वङ्शीधर मार्ग र सुवर्ण शम्शेर सडकसम्मका क्षेत्रमा बिच्छ्याइएको पाइपलाइन स्थलहरूमा प्रत्यक्ष निरीक्षण गर्दै कार्यको प्रगति बुझ्नुभएको हो।
उहाँले ती क्षेत्रहरूमा पाइपलाइन परीक्षण चाँडो सम्पन्न गरी मेलम्चीको पानी वितरण गर्न सम्बन्धित कर्मचारीलाई निर्देशन दिनुभएको छ।
बालुवाटार क्षेत्रका पाइपलाइन तेर्सो दिशात्मक ड्रिलिङ (एचडिडी) प्रविधिबाट सफलतापूर्वक निर्माण भइसकेको बताउँदै मन्त्री यादवले चाँडै वितरण सुरु हुने जनाउनुभयो।
पाइपलाइन दबाव परीक्षण (प्रेसर टेस्ट) सफल भएपछि डिएमए एच २, आई ३, आई ४ र आई ५ क्षेत्रमा मेलम्चीको पानी आपूर्ति सुरु गरिने आयोजना प्रमुख लक्ष्मी उपाध्यायले जानकारी दिनुभयो।
पानी आपूर्तिपछि करिब ३,५०० घरधुरी लाभान्वित हुने अनुमान गरिएको छ।
प्रवन्धक अमित रञ्जितका अनुसार उपत्यकाबासीलाई शुद्ध र नियमित पानी दिन दीर्घकालीन लक्ष्यसहित यो प्रणाली निर्माण गरिएको हो।