सप्तरीमा ३८८ किलो गाँजासहित एक जना पक्राउ, अनुसन्धान जारी

लिलाकान्त यादव,
राजविराज, ०४ साउन ।
 सप्तरीको राजगढ गाउँपालिका–३ नर्घोस्थित एक घरबाट ३८८ किलो ७३० ग्राम लागुऔषध (गाँजा) बरामद गरिएको छ। विशेष सूचनाका आधारमा सशस्त्र प्रहरी र इलाका प्रहरी कार्यालय कल्याणपुरको संयुक्त टोलीले सोमबार बिहान उक्त गाँजा फेला पारेको हो।
सशस्त्र प्रहरी निरीक्षक नरेन्द्र सिंह धामी र प्रहरी निरीक्षकको कमाण्डमा खटिएको टोलीले रामकेबल मण्डलको घरमा खानतलासी गर्दा निर्माणाधीन शौचालयबाट २ बोरा, गाईगोठबाट १ बोरा र बाँसको झ्याङबाट ९ बोरा गरी जम्मा १२ बोरामा गाँजा लुकाइएको अवस्थामा फेला पारेको हो।
प्रहरीका अनुसार बरामद गरिएको गाँजाको तौल ३८८ किलो ७३० ग्राम रहेको छ। घटनामा संलग्न आशंकामा मण्डलकी श्रीमती रेखा कुमारी मण्डललाई पक्राउ गरिएको छ। उनलाई इलाका प्रहरी कार्यालय कल्याणपुरमा राखेर थप अनुसन्धान भइरहेको प्रहरीले जनाएको छ।
प्रहरीले घटनालाई गम्भीर मान्दै लागुऔषध कारोबारमा संगठित गिरोहको संलग्नता हुनसक्ने भन्दै अनुसन्धानलाई तीव्र बनाएको छ। बरामद पदार्थ आवश्यक कानुनी प्रक्रिया अनुसार नष्ट गरिने जनाइएको छ।