जसपा संसदीय दलको बैठकले सरकारलाई दिएको समर्थन फिर्ता लिँदै विपक्षमा बस्ने निर्णय

लिलाकान्त यादव,
काठमाडौं, ३२ असार ।
 जनता समाजवादी पार्टी, नेपाल (जसपा) को संसदीय दलको बैठक आज सिंहदरबारस्थित दलको कार्यालयमा सम्पन्न भयो। बैठकले केपी शर्मा ओली नेतृत्वको वर्तमान सरकारलाई दिएको समर्थन फिर्ता लिने र अबदेखि प्रतिपक्षमा बस्ने निर्णय गरेको छ।
बैठकले सरकारको कार्यसम्पादनको गम्भीर समिक्षा गर्दै, भ्रष्टाचार नियन्त्रण गर्न नसकेको, सुशासनको प्रत्याभूति दिन नसकेको, संघीयता कार्यान्वयनमा उदासिनता देखाएको, संविधान संशोधनमा कुनै पहल नगरेको, जनताको आधारभूत सेवा— शिक्षा, स्वास्थ्य, खानेपानीमा सुधार गर्न नसकेको लगायतका ११ वटा प्रमुख कारण उल्लेख गर्दै सरकारलाई असफल ठहर गरेको छ।
मधेश, थरूहट, लिम्वुवान आन्दोलनका क्रममा झुटा मुद्दामा थुनिएका राजबन्दीहरूको रिहाइको माग पनि बैठकको निष्कर्षमा समेटिएको छ।
जसपाले कृषि, रोजगार, उद्योग, पर्यटन तथा उत्पीडित समुदायको हकअधिकारका मुद्दामा सरकार पूर्णतः विफल भएको बताउँदै अब पार्टीले सरकारलाई समर्थन गर्नुको कुनै औचित्य नरहेको स्पष्ट पारेको छ।