२१२ औं भानु जयन्तीमा शान्ति साहित्यिक सभा, एक लाख एक रुपियाँ राशिको पुरस्कार घोषणा

लिलाकान्त यादव,
काठमाडौं, ३१ असार ।
आदिकवि भानुभक्त आचार्यको २१२ औं जन्मजयन्तीको अवसरमा काठमाडौंको नक्सालस्थित पीस एम्बेसी भवनमा शान्ति साहित्यिक सभा तथा कविता वाचन कार्यक्रम आयोजना गरिएको छ। कार्यक्रममा २५ जना कविहरूले आ–आफ्ना रचना वाचन गर्दै भानुभक्तप्रतिको श्रद्धा व्यक्त गरे।
विश्व शान्ति तथा एकीकृत परिवार संघ र सिद्धान्त अनुसन्धान महाविद्यालय संघको संयुक्त आयोजनामा सम्पन्न कार्यक्रममा एक लाख एक रुपियाँ राशिको ’शान्ति साहित्यिक पुरस्कार’ घोषणा गरिएको छ। दक्षिण एसियाका निर्देशक तथा गीतकार कृष्णबहादुर अधिकारी सेवकले उक्त पुरस्कार घोषणा गर्दै भानु जयन्ती नेपाली भाषाको गौरव गाउने महान दिन भएको बताए। उनले नेपालदेखि दार्जिलिङसम्म नेपाली संस्कृति, भाषा र भानुभक्तको सम्मान गुञ्जायमान भएको उल्लेख गरे।
कार्यक्रमका प्रमुख अतिथि भिम उप्रेती रहेका थिए भने कवि रूपसिंह भण्डारीले सञ्चालन गरेका थिए। कार्यक्रममा सन्तोष पोखरेल, स्नेह सायमी, रञ्जना निरौला, कृष्ण बाउँसे, भोजकुमार धमला, गंगा खतिवडा, दीप डाँगी, रिता खतिवडा, सुभाषसिंह पराजुली लगायत १८ जना कविहरूले समसामयिक राजनीतिक, सामाजिक र सांस्कृतिक विषयमा आधारित कविता प्रस्तुत गरे।
कार्यक्रममा स्वागत मन्तव्य एच.बी. खत्रीले दिनुभयो भने समाजसेवी विनोद डाँगीले धन्यवाद ज्ञापन गर्नुभएको थियो। अधिकारीले नेपाली भाषालाई विश्व साहित्यमा स्थापित गर्न शान्तिका सन्देशसहित साहित्य सिर्जनाको अभियानलाई निरन्तरता दिनुपर्नेमा जोड दिनुभयो।