कोशीमा बाल अधिकार सचेतना कार्यक्रम सम्पन्न, प्रदेशस्तरीय सञ्जाल गठन

लिलाकान्त यादव,
विराटनगर, २१ असार ।
 अनौपचारिक क्षेत्र सेवा केन्द्र (इन्सेक) कोशी प्रदेश कार्यालयको आयोजनामा विराटनगरमा बाल अधिकार सचेतना समूहका सदस्यहरूको लागि सचेतना अभिवृद्धि कार्यक्रम सम्पन्न भएको छ।
कार्यक्रममा प्रहरी, मानव अधिकार, महिला सशक्तिकरण, वातावरण संरक्षण, जातीय विभेद, स्वास्थ्य सेवा र बाल अधिकारसम्बन्धी विषयमा विज्ञहरूले प्रशिक्षण दिएका थिए।
कार्यक्रमपछि मोरङकी निता कटुवालको अध्यक्षतामा सात सदस्यीय कोशी प्रदेशस्तरीय बाल अधिकार सञ्जाल गठन गरिएको छ।
सञ्जालका उपाध्यक्ष नेहारीका चौधरी, सचिव उमेश शाह, र सदस्यहरूमा प्रितिका चौधरी, राधिका चौधरी, आदर्श यादव र मेहेराज अन्सारी छन्।
कार्यक्रममा सहभागीले मानव अधिकारप्रतिको जानकारी, कर्तव्यबोध र सामाजिक रूपान्तरणमा योगदान दिन प्रेरणा प्राप्त भएको बताएका छन्।