सप्तरीको रुपनीमा गर्भवती महिलामाथि कुटपिट, गर्भमा रहेका शिशुमा असर

भुपदेव माली,
राजविराज, १६ असार ।
 रुपनी गाउँपालिका–६, भट्टनियामा एक युवकद्वारा ४ महिनाको गर्भ बोकेकी २१ वर्षीया रानी कुमारी सरदारमाथि कुटपिट भएको छ। कुटपिटबाट गर्भमा रहेका शिशुलाई समेत चोट लागेकाले पीडितको अवस्था गम्भीर रहेको बताइएको छ।
पीडित रानी कुमारीलाई आइतबार बेलुकी ७ बजे सोही स्थानका २५ वर्षीय सुनिल कुमार सरदारले पेटमा लात र मुढ्कीले प्रहार गरेका थिए। प्रारम्भिक जानकारीअनुसार, रानीले आमालाई झगडाबाट ल्याउन खोज्दा सुनिलले एक्कासी कुटपिट गरेका हुन्।
रानी कुमारी सरदारलाई तत्काल उपचारका लागि राजविराजस्थित छिनमस्ता अस्पताल लगिएको थियो। चिकित्सकीय परीक्षणले गर्भमा रहेका शिशुलाई असर परेको पुष्टि गरेपछि उनलाई थप उपचारका लागि नमस्कार अस्पताल भर्ना गरिएको छ।
कुटपिटको क्रममा रानीकी आमा कुनिया देवी सरदार र सोही स्थानका मुनर सरदारकी पत्नी घुर्नी देवी सरदार र बुहारी ममता देवी सरदारबीच विवाद भई गालीगलौज भइरहेको समयमा उक्त घटना घटेको हो।
पीडित पक्षले दोषीमाथि कडा कानुनी कारबाहीको माग गरेका छन् भने घटनाको अनुसन्धान जिल्ला प्रहरी कार्यालय सप्तरीद्वारा भइरहेको जनाइएको छ।