वीरगञ्जमा अन्तरप्रदेश राष्ट्रिय भारोत्तोलन प्रतियोगिता सुरु

र्ईमधेश न्यूज सम्वाददाता,
बिरगंज, १५ असार ।
 मधेश प्रदेश खेलकूद परिषद्को आयोजनामा तीन दिवसीय अन्तरप्रदेश राष्ट्रिय भारोत्तोलन प्रतियोगिता २०८२ आइतबारदेखि वीरगञ्जमा सुरु भएको छ।
प्रतियोगिताको उद्घाटन समारोहमा परिषद् सदस्य लभ अधिकारीले अध्यक्षता गरे भने परिषद्का सदस्य सचिव शिवजी प्रसाद गुप्ता प्रमुख अतिथिका रूपमा उपस्थित रहे। प्रमुख अतिथि गुप्ताले प्रदेशस्तरीय प्रतियोगिताले भारोत्तोलन खेलको विकास, युवा प्रतिभाको पहिचान र प्रोत्साहनमा सकारात्मक प्रभाव पार्ने विश्वास व्यक्त गरे।
प्रतियोगितामा विभिन्न प्रदेशबाट आएका खेलाडीहरूले सहभागिता जनाएका छन्। मधेश खेलकूद परिषद्ले कार्यक्रमको सञ्चालन र व्यवस्थापन गरेको हो।
आयोजकका अनुसार खेलकूदलाई राष्ट्रिय एकता र स्वस्थ जीवनशैलीको माध्यमका रूपमा अघि बढाउँदै, युवाहरूलाई अनुशासित, सक्षम र प्रतिस्पर्धी बनाउने उद्देश्य प्रतियोगिताको मुख्य प्रेरणा हो।