कृषिमा परिवर्तन ल्याउन युवालाई आधारित बनाउनु पर्छ : डा. चन्द

ईमधेश न्यूज सम्वाददाता,
लहान, १३ असार ।
 कृषिविज्ञ डा. जितबहादुर चन्दले नेपालको कृषि क्षेत्रमा परिवर्तन ल्याउन युवालाई कृषिमा आधारित बनाउन आवश्यक रहेको बताएका छन्। प्रधानमन्त्री कृषि आधुनिकीकरण परियोजनाद्वारा सिरहाको जिरोमाइलमा आयोजित कार्यक्रममा उनले युवालाई मेहनती र उद्यमशील बनाउँदै कृषि क्षेत्रमा ल्याउन सुझाव दिए।
उनका अनुसार, “देशको अर्थतन्त्रमा कृषिको महत्वपूर्ण योगदान छ। सरकारले कृषि क्षेत्रलाई प्राथमिकतामा राखेर ठूलो लगानी गरे पनि दक्ष र लगनशील जनशक्तिको अभाव छ।”
डा. चन्दले प्रधानमन्त्री कृषि आधुनिकीकरण परियोजनाले ७७ वटै जिल्लामा काम गरिरहेको र परियोजनाले धान, मकै, आलु, तरकारी तथा फलफूल (जस्तै आँप, स्याउ, सुन्तला) मा सुधार ल्याउन योगदान दिइरहेको बताए।
कार्यक्रममा परियोजनाका सिरहा प्रमुख प्रदीप ठाकुरले सप्तरी र सिरहामा सातवटा आँप जोन स्थापना गरिएको जानकारी दिए। सप्तरीमा ८,२८७ हेक्टर र सिरहामा ८,०२९ हेक्टरमा आँप खेती भइरहेको छ।
ठाकुरका अनुसार, हर्मोन प्रयोगले आँपको उत्पादन त हुने भए पनि रुखको आयु घट्ने र दीर्घकालीन दृष्टिकोणले हानिकारक हुने बताए। उनले किसानलाई आफ्नै उत्पादनको गुणस्तर सुधार गर्दै बजार व्यवस्थापनमा लाग्न सुझाव दिए।
कार्यक्रममा कृषि क्षेत्र सुधारका लागि युवा सहभागिता, दक्षता अभिवृद्धि र स्वदेशी प्रणालीमा जोड दिनुपर्नेमा सबैले जोड दिए।