सुरुङ्गा सरभाइभल्सको रोमाञ्चक जित, फाइनलमा राजबिराज रोयल्स र खडक क्वीन्स भिड्ने

लिलाकान्त यादव,
राजविराज, १३ असार ।
 राजविराज पब्लिक माविको क्रिकेट मैदानमा जारी राजबिराज मेयर कप सप्तरी महिला प्राइड लिग अन्तर्गत अन्तिम लिग खेलमा सुरुङ्गा सरभाइभल्सले राजबिराज रोयल्सलाई २३ रनले पराजित गर्दै रोमाञ्चक जित हात पारेको छ।
टस जितेर पहिले ब्याटिङ गरेको सुरुङ्गाले निर्धारित २० ओभरमा ३ विकेट गुमाउँदै १७५ रन बनायो। सुरुङ्गाकी रोमा थापाले ११ चौका प्रहारसहित ४४ बलमा ७४ रनको उत्कृष्ट इनिङ्स खेलिन्। साना प्रविणले ४१ र सानु राजबंशीले अविजित ३९ रन बनाइन्।
जवाफमा मैदान उत्रिएको राजबिराजले शिवानी साहको ५४ रनसहित राम्रो प्रदर्शन गरे पनि ५ विकेट गुमाएर १५२ रनमै सीमित भयो। सुरुङ्गाकी सरस्वती चौधरीले २ विकेट, जबकि रोजी कडारी र बिद्या रामले १–१ विकेट लिइन्।
प्लेयर अफ द म्याच सुरुङ्गाकी रोमा थापा घोषित भइन्।
प्रतियोगिताको फाइनल खेल शनिवार राजबिराज रोयल्स र खडक क्वीन्सबीच हुनेछ।