मेयर कप महिला लिगः खडक क्युईन्स ५८ रनले विजयी, ममता चौधरी प्लेयर अफ दि म्याच

लिलाकान्त यादव,
राजविराज, १२ असार ।
 राजविराजमा जारी मेयर कप सप्तरी महिला प्राइड लिग टि–२० क्रिकेट प्रतियोगिता अन्तर्गत बिहीबार सम्पन्न खेलमा खडक क्युईन्सले सुरूंगा सरभाइवल्सलाई ५८ रनले पराजित गर्दै सानदार जित हात पारेको छ।
टस जितेर पहिले ब्याटिङ गरेको खडक क्युईन्सले निर्धारित २० ओभरमा ५ विकेट गुमाउँदै १४१ रनको प्रतिस्पर्धात्मक योगफल तयार ग¥यो। टिमका लागि ममता चौधरीले ५१ बलमा ८ चौकासहित ६८ रन बनाउँदै शानदार प्रदर्शन गरिन् भने मोनिका साहले ३७ रनको सहयोग पु¥याइन्।
बलिङतर्फ सुरूंगाका दिपा रामले २ विकेट, भने रोजी कडारी, सानू राजबंशी र सरस्वती चौधरीले समान १–१ विकेट लिएका थिए।
१४२ रनको लक्ष्य पछ्याउने क्रममा सुरूंगा सरभाइवल्स १६.१ ओभरमै सबै विकेट गुमाउँदै मात्र ८३ रनमा समेटियो। उनीहरूको लागि रोमा थापाले २४ बलमा ३७ रन बनाइन् भने साना परविनले १८ रन जोडिन्।
खडकका भुमी सिंह र टीका साहले समान ३ विकेट र ममता चौधरीले २ विकेट लिए। ममता चौधरीलाई प्लेयर अफ दि म्याच घोषित गरिएको छ।
प्रतियोगिता अन्तर्गत शुक्रबार राजबिराज रोयल्स र सुरूंगा सरभाइवल्सबीच खेल हुनेछ।