योग अभ्यासले समृद्ध जीवनतर्फ डोर्याउँछ: उपराष्ट्रपति यादव

लिलाकान्त यादव,
काठमाडौं, ०६ असार ।
 उपराष्ट्रपति रामसहाय प्रसाद यादवले अन्तर्राष्ट्रिय योग दिवस २०२५ को अवसरमा स्वदेश तथा विदेशमा रहेका सम्पूर्ण नेपालीहरूलाई सुस्वास्थ्य, दीर्घायू, सुख र शान्तिका लागि शुभकामना व्यक्त गरेका छन्।
प्रत्येक वर्ष जुन २१ मा मनाइने अन्तर्राष्ट्रिय योग दिवसको अवसरमा जारी सन्देशमा उपराष्ट्रपतिले योगलाई शारीरिक अभ्यास मात्र नभई जीवनपद्धति भन्दै यसले आत्मा, शरीर र मनबीच सन्तुलन कायम गरी जीवनलाई अनुशासित र समृद्ध बनाउने बताए।
उहाँले शारीरिक व्यायाम, श्वासप्रश्वासको नियन्त्रण, ध्यान र नैतिक अनुशासनमा आधारित योग प्रणालीले भावनात्मक र मानसिक दृष्टिले व्यक्तिलाई सुदृढ बनाउन सहयोग पु¥याउने उल्लेख गर्नुभयो।
“बढ्दो तनाव, निस्क्रिय जीवनशैली र दीर्घ रोगहरूका लागि योग प्रभावकारी उपायका रूपमा स्थापित भइसकेको छ,“ उपराष्ट्रपतिले सन्देशमा उल्लेख गर्नुभयो, “हृदयघात, मधुमेहजस्ता रोगहरू रोकथाम र नियन्त्रणमा योग वैज्ञानिक रूपमा प्रमाणित उपाय हो।“
उहाँले योगलाई सबै नागरिकले आफ्नो दैनन्दिन जीवनशैलीमा समावेश गर्दै स्वस्थ, सन्तुलित र सकारात्मक सोच भएको जीवन यापन गर्नुपर्नेमा जोड दिनुभयो।
योग दिवसले शारीरिक स्वास्थ्य मात्र नभई नेपालको सांस्कृतिक सम्पदाको सम्मान र प्रचार–प्रसार गर्ने अवसरसमेत दिएको उपराष्ट्रपति यादवको भनाइ छ।
सन्देशको अन्त्यमा उनले योगले जात, धर्म, संस्कृति वा सिमानाभन्दा माथि उठी समस्त मानव समाजलाई एकता र शान्तिको सूत्रमा बाँध्ने सशक्त माध्यम बन्ने विश्वास व्यक्त गरे।