गिट्टी बालुवा हटाइ क्षति पु¥याएको भन्दै वडाध्यक्षविरुद्ध आशिष खड्गाको गुनासो

भुपदेव माली,
राजविराज, ०४ असार ।
सप्तरीको हनुमाननगर कंकालिनी नगरपालिका–१ का आशिष खड्गाले आफ्नो अनुपस्थितिमा वडा अध्यक्ष सुरेन्द्र मण्डलले गिट्टी बालुवा जेसीपी प्रयोग गरी नालीमा फालेर हजारौंको क्षति पु¥याएको गुनासो गरेका छन्।

खड्गाले निर्माणाधीन घरको लागि सडक छेउमा राखिएको निर्माण सामग्री नफाल्न पटक–पटक अनुरोध गरे पनि वडाध्यक्षको निर्देशनमा जेसीपीद्वारा जबरजस्ती हटाइएको आरोप लगाए। “सडकमा अरूले पनि सामग्री राखेका छन्, कसैको नहटाई मेरो मात्र हटाइएको छ, वडाध्यक्षको हाम्रो परिवारप्रति नियत नै खराब छ,“ खड्गाले भने।
यही विषयमा आशिषकी आमा सञ्जु देवी खड्गाले पनि इलाका प्रहरी कार्यालय भारदहमा उजुरी दिएकी छन्। “मेरो छोरा र म घरमा नहुँदा सूचना नदिई जबरजस्ती सामग्री हटाइयो, हामी न्यायालयसम्म जानेछौं,“ उनले बताइन्।
उता, वडाध्यक्ष सुरेन्द्र मण्डलले भने सात दिने सूचना टाँस गरिएको र १४ दिनसम्म पनि अटेर भएपछि मात्रै जेसीपी प्रयोग गरी बाटो खाली गरिएको प्रतिक्रिया दिएका छन्। “यो बाटो खाली गराउने अभियान हो, कसैलाई लक्षित गरिएको होइन,“ मण्डलले भने।
स्थानीय भरभलादमी, इलाका प्रहरी प्रमुख प्रनानी गोविन्द घिसिङ र पत्रकारको उपस्थितिमा खड्गा परिवारले गुनासो राखेका थिए। घटनाको थप छानबिन भइरहेको छ।