शिक्षामा व्यापारीकरण भएको भन्दै अखिल (क्रान्तिकारी)द्वारा संघर्षको घोषणा

लिलाकान्त यादव,
काठमाडौँ, ०१ असार । 
 सरकारले शिक्षामा निजीकरण र व्यापारीकरण बढाउँदै लगेको भन्दै अखिल (क्रान्तिकारी) लगायत तीन विद्यार्थी संगठनले असार १५ देखि ३० गतेसम्म देशव्यापी विद्यार्थी जागरण तथा शैक्षिक संघर्ष अभियान सञ्चालन गर्ने घोषणा गरेका छन्।
आइतबार राजधानीको संवाद डबलीमा आयोजित पत्रकार सम्मेलनमा संघर्षको कार्यक्रम सार्वजनिक गरिएको हो। नेकपा (क्रान्तिकारी माओवादी), नेकपा (बहुमत) निकट अखिल(क्रान्तिकारी) र नेकपा (मसाल) निकट अखिल (छैटौं) का नेताहरू सम्मिलित एकता राष्ट्रिय सम्मेलन आयोजक समितिको बैठकले उक्त निर्णय गरेको हो।
कार्यक्रममा संयोजक महेश श्रेष्ठले, “शिक्षा संविधानविपरीत महँगो व्यापारमा परिणत भएको छ,” भन्दै सरकारलाई जनताविरुद्धको शिक्षा नीति परिवर्तन नगरे आन्दोलन चर्काउने चेतावनी दिए।
नेता नविन खड्का, दिपक विष्ट, नेत्र शाही र शोभा सेन्चुरीले सरकारी शिक्षालयहरूलाई कमजोर पार्ने र निजी तथा विदेशी सम्बन्धनका कलेजलाई लाभ दिलाउने नीति विरुद्ध व्यापक संघर्षको तयारी भइरहेको जानकारी गराए।
कार्यक्रममार्फत एनओसी प्लस टुमा रोक, भ्रष्ट शिक्षा दलालको बहिष्कार, र सार्वजनिक शिक्षाको संरक्षणजस्ता मागसहित १० बुँदे अभियान सार्वजनिक गरिएको छ।