मेलम्ची आयोजना २०४५ सालमै सुरु भएको होः प्रदेश प्रमुख खापुङ

ईमधेश न्यूज सम्वाददाता,
विराटनगर, ०१ असार ।
 कोशी प्रदेशका प्रदेश प्रमुख परशुराम खापुङले मेलम्ची खानेपानी आयोजनाबारे आफ्नो संलग्नता रहेको ऐतिहासिक प्रसंग सुनाएका छन्। उनले वि.सं. २०४५ सालमा आफू आवास तथा योजना मन्त्रालयअन्तर्गत खानेपानी मन्त्री हुँदा मेलम्ची आयोजना प्रारम्भ भएको बताएका हुन्।
उनका अनुसार, इन्जिनियर डीपी साहको नेतृत्वमा त्यतिबेला पटक–पटक सर्भे गरिएको थियो भने २०४८ सालपछि आयोजना मूर्तरूपमा अघि बढेको हो।
प्रदेश प्रमुख खापुङले उक्त भनाइ टंकिसिनवारी खानेपानी तथा सरसफाई सामुदायिक संस्था, बुढिगंगा–३, नेमुवा मोरङद्वारा आयोजित १४औं साधारणसभा कार्यक्रममा व्यक्त गरेका हुन्।
कार्यक्रममा उनले संस्थालाई जग्गादान गर्ने संविधानसभा सदस्य वीरेन्द्रकुमार माझी र उनकी श्रीमती रेखादेवी माझीलाई सम्मान समेत गरेका थिए।
सो कार्यक्रममा बुढिगंगा गाउँपालिकाका अध्यक्ष जीतनारायण थापा, मनमोहन प्राविधिक विश्वविद्यालयका उपकुलपति डा. सुवासश्री पोखरेल, संघीय खानेपानी तथा ढल व्यवस्थापन आयोजना, विराटनगरका प्रमुख सुरतलाल चौधरीलगायतको उपस्थिति रहेको थियो।