हनुमाननगर कंकालिनी नगरपालिकाका किशोर–किशोरीलाई साइबर सुरक्षाबारे सचेतना कार्यक्रम

लिलाकान्त यादव,
राजविराज, ३१ जेष्ठ ।
 सप्तरीको हनुमाननगर कंकालिनी नगरपालिकाका किशोर–किशोरीहरूलाई लक्षित गरी डिजिटल सुरक्षाका उपाय र मानसिक स्वास्थ्यका आधारभूत पक्षहरूबारे एक दिने अभिमुखीकरण कार्यक्रम सम्पन्न भएको छ।
कार्यक्रमको उद्देश्य किशोर–किशोरीहरूलाई सुरक्षित डिजिटल व्यवहार, सामाजिक सञ्जालको सचेत प्रयोग, अनलाइन जोखिमबाट जोगिने उपाय र आत्मस्वीकृति, तनाव व्यवस्थापन तथा मानसिक सन्तुलनका विषयमा जानकारी गराउनु रहेको थियो।
कार्यक्रममा सहभागीहरूले डिजिटल युगमा किशोर पुस्ताले सामना गर्नुपर्ने साइबर अपराध, व्यक्तिगत गोपनीयता, अनलाइन उत्पीडन लगायत विषयमा प्रशिक्षण लिएका थिए। साथै, उनीहरूलाई मानसिक स्वास्थ्यको महत्व, कसरी आत्मबल कायम राख्ने, कसरी तनाव व्यवस्थापन गर्ने, र कसरी सकारात्मक सोच विकास गर्ने भन्ने विषयमा पनि प्रशिक्षित गरिएको थियो।
नगरपालिकाले यस्ता कार्यक्रम किशोर–किशोरीको समग्र व्यक्तित्व विकास, सुरक्षित व्यवहार र मानसिक सशक्तीकरणका लागि प्रभावकारी हुने विश्वास व्यक्त गरेको छ।
कार्यक्रममा स्थानीय विद्यालयका विद्यार्थी, शिक्षक, स्वास्थ्यकर्मी तथा सामाजिक कार्यकर्ताको उपस्थिति रहेको थियो।