राजविराज नगरपालिकामा शक्ति संघर्ष, लेखा अधिकृत कुटिए

ईमधेश न्यूज सम्वाददाता,
राजविराज, २७ जेष्ठ ।
 राजविराज नगरपालिकामा निलम्बित मेयर भीमराज यादव र कार्यवाहक मेयर इसरत परविन पक्षबीचको शक्ति संघर्ष मंगलबार हिंसात्मक झडपमा परिणत भएको छ। प्रमुख प्रशासकीय अधिकृतको नियुक्ति विवादले चर्किँदा नगरपालिका कार्यालयमा तोडफोड र कुटपिटको घटना भएको हो।
झडपमा लेखा अधिकृत शत्रुधनलाल दाससहित दुई जना घाइते भएका छन्। उनीहरूको उपचार गजेन्द्रनारायण सिंह अस्पतालमा भइरहेको छ।
विवाद कार्यवाहक मेयर परविनले शिक्षा शाखा प्रमुख भोगेन्द्र यादवलाई निमित्त प्रमुख प्रशासकीय अधिकृत बनाउने निर्णयपछि चर्किएको हो। त्यसको विरोधमा निलम्बित मेयर पक्षले तीन दिनदेखि तालाबन्दी गरिरहेको थियो।
मंगलबार कार्यवाहक मेयरले प्रहरीको सहयोगमा ताला खोलेर पदभार ग्रहण गराउने प्रयास गर्दा स्थिति तनावग्रस्त बन्यो। ढुंगामुढा र कुटपिट भएपछि सुरक्षाकर्मीले कार्यवाहक मेयर र नवनियुक्त प्रमुखलाई कार्यालयभित्रै सुरक्षामा राख्नुपरेको थियो।
निलम्बित मेयर यादवले आन्दोलनमाथि दमन गरिएको आरोप लगाएका छन् भने कार्यवाहक मेयर परविनले “अनौचित्यपूर्ण आन्दोलनले विकास रोकिएको“ भन्दै निकासको प्रयास गरेको दाबी गरेकी छन्।