सप्तरी–सिरहा हुँदै गाईघाट जाने नयाँ सडक ट्रयाक खोलिँदै

ईमधेश न्यूज सम्वाददाता,
राजविराज, २४ जेष्ठ ।
 सप्तरीको कल्याणपुर बजार हुँदै उदयपुरको मोतीगढा–गाईघाटसम्म पुग्ने नयाँ सडक ट्रयाक खोल्ने कार्य तीव्र गतिमा अगाडि बढिरहेको छ। सडक डिभिजन कार्यालय लहानका अनुसार करिब १७ किलोमिटर लामो यो ट्रयाक पूर्व–पश्चिम राजमार्गदेखि चुरे क्षेत्र पार गर्दै गाईघाट जोड्नेछ।
शुक्रबार सडक निर्माणको शिलान्यास संघीय सांसद तथा युवा तथा खेलकुद विकासमन्त्री तेजुलाल चौधरीले गरेका थिए। उनले सहरीकरण र जनघनत्वको कारण यातायात सहज बनाउन नयाँ मार्ग आवश्यक रहेको बताए।
स्थानीय व्यापारीहरूका अनुसार ट्रयाक खुल्नासाथ व्यापार, कृषि र यातायातमा ठूलो सुधार आउनेछ। व्यवसायी राजेश यादवले पहाड–तराईबीच ढुवानी सजिलो हुने बताए। स्थानीय सञ्जु चौधरीले ट्रयाकपछिको चरणमा कालोपत्रे गर्न बजेट आए फिलिली क्षेत्रबाट गाईघाट पुग्न छोटो समय लाग्ने बताए।
चार करोड ४० लाख रुपैयाँ बराबरको ठेक्का सम्झौता मिशन कन्ट्रक्सन एण्ड स्प्लायर्स प्रालि सँग भएको छ। निर्माण कम्पनीका इञ्जिनियर सुरेन्द्र जैसवालका अनुसार १० मिटर चौडाइको ट्रयाक बनाइँदैछ। वन कार्यालयको ढिलाइपछि हाल स्वीकृति आएपछि काम तीव्र भएको डिभिजनका इञ्जिनियर चन्द्रकान्त चौधरीले जानकारी दिए।