उपराष्ट्रपति यादवद्वारा ईद–उल–अज्हाको शुभकामना

लिलाकान्त यादव,
काठमाडौं, २४ जेष्ठ ।
 उपराष्ट्रपति रामसहाय प्रसाद यादवले इस्लाम धर्मावलम्बीहरूको महान पर्व ईद–उल–अज्हाको अवसरमा स्वदेश तथा विदेशमा रहेका सम्पूर्ण नेपाली मुस्लिम समुदायलाई हार्दिक शुभकामना व्यक्त गरेका छन्।
शुभकामना सन्देशमार्फत उपराष्ट्रपतिले यो पर्वले आपसी सद्भाव, भाईचारा, शान्ति र त्यागको सन्देश फैलाउने विश्वास व्यक्त गरे। उनले इस्लाम धर्ममा रहेको कुर्बानीको भावना आत्मशुद्धि, परोपकार र मानवीय मूल्यमान्यतासँग जोडिएको उल्लेख गर्दै हरेक धर्ममा रहेको त्यागको महत्वलाई स्मरण गराए।
पछिल्लो समय धार्मिक विकृति र विसंगति हटाउँदै मूल मर्म र दर्शनको प्रवद्र्धन आवश्यक रहेको उल्लेख गर्दै उनले सबै धर्मावलम्बीहरूलाई सहिष्णुता, समभाव र मानवता कायम राख्न आह्वान गरे।
नेपालको बहुधार्मिक, बहुसांस्कृतिक पहिचानले सबै धर्मबीच सद्भाव र सम्मानको परम्परा स्थापित गरेको उल्लेख गर्दै उपराष्ट्रपतिले यस पर्वले राष्ट्रिय एकता, सामाजिक समरसता र समृद्ध नेपालको निर्माणमा प्रेरणा दिन सकोस् भन्ने शुभेच्छा व्यक्त गरे।