सप्तरीमा मोटरसाइकल दुर्घटना: एकको मृत्यु, एक गम्भीर घाइते

उमेश कुमार यादव,
राजविराज, २२ जेष्ठ ।
 पूर्वपश्चिम राजमार्ग अन्तर्गत सुरुङ्गा नगरपालिका–६, करडवोनामा बुधबार राति मोटरसाइकल दुर्घटना हुँदा एक युवकको मृत्यु भएको छ भने अर्का एक जना गम्भीर घाइते भएका छन्।
दुर्घटनामा अग्नीसाइर कृष्णासवरन गाउँपालिका–२ का १९ वर्षीय सुजित चौधरीको मृत्यु भएको जिल्ला प्रहरी कार्यालय सप्तरीले जनाएको छ। सुजित सवार बा ८७ प ९९७ नम्बरको मोटरसाइकल तीव्र गतिमा पूर्वतर्फ जाँदै गर्दा सडकमा राखिएको डिभाइडरमा ठोक्किँदा दुर्घटना भएको हो।
राति ८ः३० बजे भएको दुर्घटनापछि घाइते दुबै जनालाई सिरहास्थित धामनी अस्पताल पु¥याइएको थियो। टाउको, अनुहार र शरीरमा गम्भीर चोट लागेका सुजितलाई थप उपचारका लागि विराटनगर लैजाँदै गर्दा अवस्था जटिल बनेपछि राजविराजस्थित गजेन्द्रनारायण सिंह अस्पतालमा ल्याइएको थियो। अस्पतालमा राति १०ः५० बजे उनलाई मृत घोषणा गरिएको प्रहरीले जनाएको छ।
दुर्घटनामा घाइते भएका २१ वर्षीय अविषेक चौधरीको हात र खुट्टामा गम्भीर चोट लागेको छ। उनलाई उपचारका लागि धरानस्थित अस्पतालमा लगिएको घाइतेका आफन्तले जनाएका छन्।
दुर्घटनापछि मोटरसाइकल इलाका प्रहरी कार्यालय करडवोनाको नियन्त्रणमा रहेको र घटनाबारे थप अनुसन्धान भइरहेको प्रहरीले जनाएको छ।