विवाहको न्यूनतम उमेर १८ वर्ष बनाउने प्रस्ताव: मन्त्री साह

लिलाकान्त यादव,
जनकपुर, १८ जेष्ठ ।
 महिला, बालबालिका तथा ज्येष्ठ नागरिकमन्त्री नवलकिशोर साहले विवाह गर्ने न्यूनतम उमेर घटाउनुपर्ने सुझाव दिएका छन्।
जनकपुरधाममा आयोजित ‘राष्ट्रिय बालबालिका नीति, २०८०’ कार्यान्वयन कार्ययोजना मस्यौदासम्बन्धी मधेश प्रदेशस्तरीय राय सुझाव कार्यक्रममा बोल्दै उनले वर्तमान कानुनले केटीका लागि तोकेको २० वर्षको उमेर हदलाई घटाएर १८ वर्ष बनाउनुपर्ने धारणा राखे।
मन्त्री साहले सामाजिक, धार्मिक र अभिभावकीय पक्षले समेत कम उमेरमै विवाह उपयुक्त ठान्ने भन्दै विवाह उमेर घटाउँदा व्यावहारिक रूपमा राम्रो परिणाम आउने दाबी गरे।
उनका अनुसार यससम्बन्धी प्रस्ताव संघीय संसदमा प्रस्तुत गरिसकिएको छ। मन्त्रीको यस्तो भनाइले बालविवाहसम्बन्धी चासो र बहस पुनः सतहमा ल्याएको छ।