प्रधानमन्त्री ओलीद्वारा मधेशमा ६४ सडकको एकैसाथ शिलान्यास

ईमधेश न्यूज सम्वाददाता,
जनकपुर, १८ जेष्ठ ।
 प्रधानमन्त्री केपी शर्मा ओलीले आइतबार मधेश प्रदेशको ‘एक निर्वाचन क्षेत्र ः एक सडक’ कार्यक्रमअन्तर्गत ६४ वटा सडक योजनाको एकैसाथ विद्युतीय रूपमा शिलान्यास गरेका छन्।
धनुषाको जनकपुरधामस्थित महेन्द्रनारायण निधि सभागृहमा आयोजित कार्यक्रममा प्रधानमन्त्री ओलीले मधेश प्रदेश सरकारको भौतिक पूर्वाधार विकास मन्त्रालयद्वारा सञ्चालन गरिने ती योजनाको शिलान्यास गरेका हुन्।
‘एक निर्वाचन क्षेत्र ः एक सडक’ कार्यक्रम प्रदेश सरकारको गौरवको योजना हो, जसअन्तर्गत प्रत्येक संघीय निर्वाचन क्षेत्रमा कम्तीमा एक महत्वपूर्ण सडक निर्माण गर्ने लक्ष्य छ।
प्रधानमन्त्री ओलीले विकास र समृद्धिको आधार सडक भएको उल्लेख गर्दै मधेश प्रदेशको दिगो विकासका लागि संघीय सरकारले निरन्तर सहयोग गर्ने प्रतिबद्धता व्यक्त गरे।