सप्तरीमा जंगली हात्तीको आक्रमणबाट एक वृद्धको मृत्यु

लिलाकान्त यादव,
राजविराज, १७ जेष्ठ ।
 सप्तरीको कञ्चनरूप नगरपालिका–१२ धरमपुरमा जंगली हात्तीको आक्रमणबाट एक वृद्धको मृत्यु भएको छ। शनिबार बिहान आफ्नै मकै बारीमा बसेका ६६ वर्षीय स्थानीय केदार बिष्टको हात्तीको आक्रमणबाट घटनास्थलमै मृत्यु भएको इलाका प्रहरी कार्यालय कञ्चनपुरले जनाएको छ।
बिष्ट बिहान मकै बारीमा मकै कुरिरहेका बेला अचानक जंगली हात्तीले आक्रमण गरेको थियो। आक्रमणबाट उनी गम्भीर घाइते भई घटनास्थलमै ज्यान गुमाएका प्रहरी प्रमुख डिएसपी माधवप्रसाद काफ्लेले जानकारी दिए।
प्रहरीका अनुसार घटना स्थल घरदेखि करिब १०० मिटर टाढा रहेको छ। स्थानीयवासीको भनाइ अनुसार सो क्षेत्र आसपासमा पछिल्ला दिनमा जंगली हात्तीको आतंक बढ्दै गएको छ।
प्रहरीले घटनाको विस्तृत अनुसन्धान अगाडि बढाएको बताइएको छ।