राष्ट्रिय महिला अधिकार दिवस २०८२ ः उपराष्ट्रपति यादवद्वारा सशक्त सन्देश

लिलाकान्त यादव,
काठमाडौं, १६ जेष्ठ ।
सातौं राष्ट्रिय महिला अधिकार दिवस २०८२ को अवसरमा उपराष्ट्रपति रामसहाय प्रसाद यादवले सम्पूर्ण नेपाली महिलाहरूप्रति शुभकामना व्यक्त गर्दै महिला अधिकार, लैङ्गिक समानता र सशक्तीकरणको पक्षमा सबैलाई एकजुट भएर अघि बढ्न आह्वान गरेका छन्।
दिवसको सन्दर्भमा उपराष्ट्रपति यादवले देश र विदेशमा रहेका सम्पूर्ण नेपाली दिदीबहिनीहरूलाई सुख, शान्ति र समृद्धिको कामना गर्दै यो दिवस महिला अधिकारका चार ऐतिहासिक उपलब्धीको स्मरण गर्ने अवसर भएको उल्लेख गरेका छन्। ती उपलब्धीहरूमा — बाबु वा आमामध्ये एकको नामबाट नागरिकता प्राप्त गर्ने, राज्यको संरचनामा कम्तीमा एक तिहाइ महिला सहभागिता, विभेदकारी कानुनको खारेजी, र महिलाविरुद्ध हुने हिंसा अन्त्य — समावेश छन्।
उपराष्ट्रपति यादवले संविधानले सुनिश्चित गरेका लैङ्गिक समानतासम्बन्धी व्यवस्थाहरूको प्रभावकारी कार्यान्वयन आवश्यक भएको बताउँदै शिक्षादेखि स्वास्थ्य, आर्थिक स्वतन्त्रता, राजनीतिक सहभागिता, र नेतृत्व विकाससम्मका विषयमा महिलाको अधिकार सुनिश्चित गर्न ठोस नीति तथा कार्यक्रमको जरुरी औँल्याए।
उनले समाजमा व्याप्त बालविवाह, दाइजो प्रथा, लैङ्गिक हिंसा र असमानता विरुद्ध जागरुकता र सामुदायिक एकता आवश्यक भएको उल्लेख गर्दै सबै नागरिकलाई जिम्मेवार बन्न आह्वान गरे।
संविधानले महिलालाई सम्पत्तिमा समान हक दिएको, प्रदेश र राष्ट्रिय सभामा अनिवार्य प्रतिनिधित्व सुनिश्चित गरेको, र नागरिकतामा सुधार ल्याएको विषयलाई उनले सकारात्मक कदमको रूपमा व्याख्या गरे।
अन्त्यमा, उपराष्ट्रपति यादवले भने, “महिला अधिकारको प्रत्याभूति बिना समाजको समान विकास सम्भव छैन। समृद्ध, न्यायपूर्ण र सशक्त नेपालको निर्माणका लागि सबैले मिलेर अघि बढ्न आवश्यक छ।”