तस्लीम अन्सारीमाथि अन्याय : संघीय गणतान्त्रिक मोर्चाले आन्दोलनको घोषणा

ईमधेश न्यूज सम्वाददाता,
राजविराज, १४ जेष्ठ ।
 सर्लाहीका तस्लीम अन्सारीमाथि भएको अमानवीय व्यवहार र त्यसपछि राज्य संयन्त्रले उल्टै पीडकमाथि मुद्दा लगाएको घटनाले राष्ट्रियस्तरमा तीव्र विरोध र आलोचना चर्किएको छ। संघीय गणतान्त्रिक गठबन्धनका शीर्ष नेताहरू पीडितसँग ऐक्यबद्धता जनाउँदै सिधै घटनास्थल पुगेका छन्।
नेपाल संघीय समाजवादी पार्टीका अध्यक्ष तथा पूर्वगृह राज्यमन्त्री मोहम्मद रिजवान अन्सारीले यो घटनालाई न्याय प्रणालीकै अपमान भनेका छन्। उनले भने, "पीडित तस्लीममाथि अन्याय हुनु लाजमर्दो मात्र होइन, राज्यको चरित्रकै कलङ्क हो।"
संघीय गणतान्त्रिक मोर्चाले जेठ १५ गते जनकपुरमा विशाल जुलुसमार्फत मोर्चाको औपचारिक घोषणा गर्दै न्याय, समानता र उत्पीडित वर्गको सशक्त आवाज उठाउने जनाएको छ।
अन्य नेताहरू—बहुजन एकता पार्टीका हरिनन्दन कुमार रञ्जन, नेपाल सद्भावना पार्टीका रामकुमार महतो, नेपाल जनजागृति पार्टीका ध्रुवलाल निषाद र सांसद विमला अन्सारीले संविधान, गणतन्त्र र समावेशी मूल्यको रक्षा गर्न निर्णायक संघर्षको आह्वान गरेका छन्।
संघीय मोर्चाको आन्दोलन केवल तस्लीमको मुद्दा होइन, सामाजिक न्याय, आत्मसम्मान र उत्पीडनविरुद्धको ऐतिहासिक सुरुवात भएको मोर्चाले स्पष्ट पारेको छ।