उत्तेजक अभिव्यक्तिप्रति मानव अधिकार आयोगको गम्भीर आपत्ति

ईमधेश न्यूज सम्वाददाता,
राजविराज, १२ जेष्ठ ।
 राष्ट्रिय मानव अधिकार आयोगले प्रधानमन्त्री केपी शर्मा ओलीको पछिल्लो अभिव्यक्तिप्रति गम्भीर ध्यानाकर्षण भएको जनाएको छ। राजतन्त्र समर्थक संयुक्त जनआन्दोलन समितिले जेठ १५ गते काठमाडौंमा आयोजना गर्न लागेको प्रदर्शनसँग सम्बन्धित विषयमा बोल्दै प्रधानमन्त्री ओलीले “काठमाडौं जेठ १५ गते ११ बजेबाट २ बजेसम्म एमालेको नियन्त्रणमा हुनुपर्छ” भन्ने अभिव्यक्तिप्रति आयोगले आपत्ति जनाएको हो।
आयोगका अनुसार यस्तो अभिव्यक्ति विधिको शासन, लोकतान्त्रिक अभ्यास र अभिव्यक्ति स्वतन्त्रताविपरीत छ। देशको शान्ति सुरक्षा र अमनचयन कायम राख्ने जिम्मेवारी राज्यका सुरक्षा निकायको हो, कुनै पार्टी विशेषले राजधानी नियन्त्रणमा लिने निर्देशन दिनु लोकतान्त्रिक मूल्य र मान्यता विपरीत हुने आयोगको भनाइ छ।
आयोगले शान्तिपूर्ण रूपमा विचार, अभिव्यक्ति र प्रदर्शन गर्न पाउने हक संविधानले सुनिश्चित गरेको स्मरण गराउँदै, उत्तेजनात्मक अभिव्यक्तिले भिडन्त निम्त्याउने खतरा रहेको स्पष्ट पारेको छ।
राजतन्त्र समर्थक आन्दोलनको सन्दर्भमा आयोगमा आन्दोलनको अनुगमन गर्न माग गरिएको जानकारीपत्र प्राप्त भइसकेको छ। आयोगले प्रधानमन्त्रीलगायत सबै पक्षलाई शान्ति र सहिष्णुता कायम राख्ने र भ्रामक तथा उत्तेजक अभिव्यक्ति नदिन आग्रह गरेको छ।
आयोगले मानव अधिकार र लोकतन्त्रको मर्मअनुसार जिम्मेवार व्यवहार देखाउन आह्वान गरेको छ।