बट सावित्री व्रत हर्षोल्लासका साथ सम्पन्न

लिलाकान्त यादव,
राजविराज, १२ जेष्ठ ।
 हिन्दू वैवाहिक महिलाहरूले आज जेष्ठ औँसीका दिन बट सावित्री व्रत धार्मिक श्रद्धा र हर्षोल्लासका साथ मनाएका छन्। विशेषगरी मिथिला क्षेत्रमा बरसाईत नामले प्रचलित यो व्रत महिलाहरूले आफ्ना पतिको दीर्घायु, सुख–शान्ति र सन्तानको कल्याणका लागि मनाउने परम्परा रहिआएको छ।
सप्तरी, सिरहा, धनुषा, महोत्तरी लगायतका मिथिला क्षेत्रका गाउँ–शहरहरूमा आज बिहानै महिलाहरूले स्नान गरी नयाँ लुगा लगाएर बरको रुखमुनि पूजा गरे। उपवास बसेर सावित्री–सत्यवानको कथा सुनेपछि ठूला–बडाबाट आशीर्वाद लिने चलन अनुसार पूजापछि सामूहिक कथा पाठ र भजन कीर्तनसमेत गरिएको थियो।
सावित्रीले आफ्नो पतिको प्राण यमराजबाट फर्काएको धार्मिक कथालाई आधार मानेर हरेक वर्ष यो व्रत श्रद्धापूर्वक मनाइन्छ। व्रतका माध्यमबाट महिलाहरूले नारी शक्ति, प्रेम, निष्ठा र समर्पणको आदर्श प्रस्तुत गर्ने विश्वास गरिन्छ।
धार्मिक आस्थाका साथै सामाजिक समृद्धिको पक्ष बोकेको यो पर्वले महिला एकताको भावनालाई पनि मजबुत बनाउने गरेको सहभागी महिलाहरूले बताएका छन्। बट सावित्री व्रत मिथिला क्षेत्रको मौलिक सांस्कृतिक सम्पदा हो, जसले पुस्तादरपुस्ता आस्था र परम्परालाई जीवित राख्दै आएको छ।