जसपा संसदीय दलमा भूमि विधेयक संशोधनबारे महत्वपूर्ण सहमति

लिलाकान्त यादव,
राजविराज, ०८ जेष्ठ ।
 जनता समाजवादी पार्टी, नेपाल (जसपा) को संसदीय दलको कार्यालयमा भूमि सम्बन्धी विधेयकमा आवश्यक संशोधनको विषयमा महत्वपूर्ण छलफल सम्पन्न भएको छ। छलफलपछि विधेयकका ११ वटा दफा तथा उपदफामा संशोधन गर्ने सहमति बनेको छ।
संशोधन प्रस्तावअनुसार, मधेश प्रदेशका पुराना ऐतिहासिक शहरहरू — विशेषगरी राजविराज र जनकपुरधाम — मा वर्षौँदेखि भोगचलनमा रहेका विटौरी जमिनहरूलाई नाप–नक्सा गरेर कानुनी रूपमा जग्गाधनी प्रमाणपत्र (पुर्जा) वितरण गरिने व्यवस्था विधेयकमा समावेश गरिने छ।
यस पहलमार्फत दीर्घकालीन रूपमा भूमिमा अधिकारको सुनिश्चितता, सामाजिक न्यायको प्रवद्र्धन, र भू–सम्बन्धी समस्याको दीगो समाधान गर्ने उद्देश्य राखिएको जसपा संसदीय दलले स्पष्ट पारेको छ। संशोधनले भूमिहीन तथा परम्परागत रूपमा जमिन उपयोग गर्दै आएका समुदायलाई औपचारिक स्वामित्व दिलाउने अपेक्षा गरिएको छ।