आगामी वर्षदेखि ६८ वर्षमाथिका ज्येष्ठ नागरिकले पाउने सामाजिक सुरक्षा भत्ताः मन्त्री सुडी

लिलाकान्त यादव,
राजविराज, ०५ जेष्ठ ।
 महिला, बालबालिका तथा ज्येष्ठ नागरिकमन्त्री नवलकिशोर साह सुडीले आगामी आर्थिक वर्ष २०८२÷८३ देखि ६८ वर्षमाथिका ज्येष्ठ नागरिकलाई सामाजिक सुरक्षा भत्ता दिने व्यवस्था गरिने जानकारी दिएका छन्।
प्रतिनिधिसभाको बैठकमा सांसद प्रेम सुवालको प्रश्नको उत्तर दिँदै मन्त्री सुडीले हाल ७० वर्षमाथिका ज्येष्ठ नागरिकले पाउँदै आएको भत्ता अब ६८ वर्षमा झार्ने तयारी भइरहेको बताए। सामाजिक सुरक्षा ऐन, २०७५ अनुसार हाल दलित र एकल महिला ज्येष्ठ नागरिकले ६० वर्षमा र अन्यले ७० वर्ष पुगेपछि मात्र भत्ता पाउने व्यवस्था छ।
मन्त्री सुडीले गैरसरकारी संस्थाहरूलाई समाज कल्याण परिषद्मार्फत एकद्वार प्रणालीबाट परिचालन गर्ने नीतिलाई प्रभावकारी बनाउने तयारी भइरहेको बताए। नेपाल राष्ट्र बैंकलाई परिषद्को स्वीकृति प्राप्त परियोजनाहरू मात्र रकम सञ्चालन गर्न अनुरोध गरिएपछि परिषद्मा दर्ता हुने संस्थाहरूको संख्या बढेको पनि जानकारी दिए।
उनका अनुसार आर्थिक वर्ष २०८०÷८१ मा १,३०४ संस्थाले २,०८४ परियोजना सञ्चालन गरेका थिए भने चालु आवको चैत मसान्तसम्म १,३२४ संस्थाका १,८३३ परियोजना स्वीकृत भएका छन्।
साथै, मन्त्री सुडीले सप्तरीको शम्भुनाथ नगरपालिका–३ कचन्दाहाका मागैन सदा, चन्द्र सदा लगायत नागरिकता नभएका दलितहरू ७२ वर्षको उमेरसम्म पनि सामाजिक सुरक्षा भत्ता नपाएको उल्लेख गर्दै नागरिकता अभावकै कारण उनीहरू सेवा पाउनबाट वञ्चित भएको बताए।