सप्तरीमा चट्याङले बालिकाको मृत्यु, एक बालक घाइते

लिलाकान्त यादव,
राजविराज, ०३ जेष्ठ ।
 सप्तरीको हनुमाननगर कंकालिनी नगरपालिका–१४ डालवामा शुक्रबार बिहान चट्याङको कारण एक बालिकाको मृत्यु भएको छ भने अर्का एक बालक घाइते भएका छन्।
भारतको उत्तर प्रदेश, सामलि केरना पञ्चायत वडा नं. ८१ घर भई हाल कोशीको बगरमा अस्थायी टहरा बनाएर खरबुजा खेती गर्दै आएका जाहिद खानकी ७ वर्षीया छोरी जेनव खातुन र गुलु खानका ७ वर्षीय छोरा जुविर खान बिहान करीब ५ः३० बजेको समयमा चट्याङको ध्वनिले आत्तिएर घाइते भएका थिए।
दुवै जनालाई उपचारका लागि तत्काल छिन्नमस्ता अस्पताल, राजविराज ल्याइए पनि जेनव खातुनलाई चिकित्सकले बिहान ८ः१५ बजे मृत घोषणा गरेका छन्। जुविर खानको अवस्था भने सामान्य रहेको अस्पताल स्रोतले जनाएको छ।
घटनाको जानकारी पाउनेबित्तिकै रामपुरमल्हनिया प्रहरी चौकीबाट प्रहरी टोली घटनास्थलतर्फ खटिएको थियो। मृतकको शव हाल अस्पतालमै राखिएको छ।