राजनीति तीन ध्रुवमा विभाजित हुँदैछः उपेन्द्र यादव

ईमधेश न्यूज सम्वाददाता,
जनकपुरधाम, २६ बैशाख ।
जनकपुरधाम जनता समाजवादी पार्टी (जसपा) नेपालका अध्यक्ष उपेन्द्र यादवले देशको राजनीति अग्रगामी, यथास्थितिवादी र पश्चगामी गरी तीन ध्रुवमा विभाजित भइरहेको बताएका छन्। धनुषामा आयोजित जसपा नेपालको प्रथम जिल्ला अधिवेशनलाई सम्बोधन गर्दै उनले वर्तमान राजनीतिक परिदृश्यमा संघीय लोकतान्त्रिक गणतन्त्रको रक्षा र विकासका लागि अग्रगामी शक्तिहरू दृढ भए पनि यथास्थितिवादी र पश्चगामी शक्तिहरूले लोकतान्त्रिक उपलब्धिहरूमाथि संकट खडा गरिरहेको आरोप लगाए।
अध्यक्ष यादवले जनआन्दोलन, सशस्त्र विद्रोह र मधेस आन्दोलनबाट प्राप्त संघीय लोकतान्त्रिक गणतन्त्र, समावेशीता, नागरिक स्वतन्त्रता र मौलिक हक जोगाउन अग्रगामी शक्तिहरू प्रतिबद्ध रहे पनि यथास्थितिवादी शक्तिहरूले ती मान्यतालाई आत्मसात् गर्न नसकेको बताए।
उनका अनुसार पछिल्लो समय पश्चगामी धारहरूले टाउको उठाउँदै संघीयता र समावेशीतामाथि प्रहार गर्ने दुस्साहस गरिरहेका छन्। उनले समानता, सहभागिता र समानुपातिक प्रतिनिधित्व अझै पनि सुनिश्चित नभएको बताउँदै उपलब्धिहरू जोगाउन जसपा चट्टानी अडानका साथ उभिनुपर्ने समय आएको स्पष्ट पारे।
यादवले राजनीतिक अस्थिरताको कारणले राष्ट्रिय एजेन्डाहरू ओझेलमा परिरहेको र सशक्त अग्रगामी आन्दोलन आवश्यक भएको धारणा राखे।