‘नेपाली विद्यार्थीको हत्या दुःखद, तर भारतीय विश्वविद्यालयमा समग्रमा सुरक्षित वातावरण’

ईमधेश न्यूज सम्वाददाता,
काठमाडौं, २५ बैशाख ।
 सन्दिप विश्वविद्यालय, महाराष्ट्रले बिहीबार काठमाडौंमा पत्रकार सम्मेलन गर्दै भारतीय विश्वविद्यालयमा नेपाली विद्यार्थीका लागि समग्रमा सुरक्षित र सकारात्मक वातावरण रहेको बताएको छ। विश्वविद्यालयका व्यवस्थापक आरएन झाले केही क्याम्पसहरूमा भएको घटनाले आफूहरू स्तब्ध भएको जनाउँदै दोषीमाथि छानबिन गरी न्याय दिलाउन भारत सरकारले प्रक्रिया अघि बढाएको बताए।
झाले नेपाली विद्यार्थीप्रति आफूहरूको गम्भीरता र संवेदनशीलता रहेको जनाउँदै महाराष्ट्र नासिक र बिहार मधुवनीस्थित क्याम्पसमा अध्ययनरत नेपाली विद्यार्थीहरूका लागि ८ करोड भारु (झण्डै १३ करोड नेपाली रुपैयाँ) बराबरको छात्रवृत्ति घोषणा गरेका छन्। उनले आर्थिक रूपले कमजोर र मेधावी विद्यार्थीहरूलाई लक्षित गरी सो व्यवस्था गरिएको बताए।
विश्वविद्यालयका अर्का प्रतिनिधि अमित यादवले नेपाल–भारतबीचको ऐतिहासिक सम्बन्धलाई स्मरण गर्दै भाषा, संस्कृति र शिक्षाको साझा सम्बन्धले गर्दा नेपाली विद्यार्थीहरूप्रति विशेष ध्यान दिइएको उल्लेख गरे।
उनका अनुसार दुई क्याम्पसमा २५ हजार विद्यार्थीमध्ये २ सयभन्दा बढी नेपाली विद्यार्थी अध्ययनरत छन्।
उनीहरूले भारतीय शिक्षण संस्थाहरूमा सुरक्षा, सुविधा र अवसरको भरपूर व्यवस्था रहेको भन्दै नेपाली अभिभावक र विद्यार्थीहरूलाई निश्चिन्त भएर आउन आह्वान गरे।