भ्रष्टाचारविरुद्ध संघर्षमा कम्युनिष्ट युवा संगठन

ईमधेश न्यूज सम्वाददता,
काठमाडौं, २२ वैशाख ।
कम्युनिष्ट युवा संगठन नेपालले एमाले, काँग्रेस र माओवादी मिलेर देशलाई लुटिरहेको आरोप लगाउँदै तीव्र संघर्ष गर्ने घोषणा गरेको छ। सोमबार काठमाडौंमा पत्रकार सम्मेलन गर्दै संगठनका अध्यक्ष हरिश भट्टले हालै सम्पन्न प्रथम राष्ट्रिय सम्मेलनका निर्णयहरू सार्वजनिक गरे।
उनले देशमा ‘लुटतन्त्र’ संस्थागत भइसकेको आरोप लगाउँदै भ्रष्टाचार नियन्त्रणका लागि राजनीतिक र प्रशासनिक नेतृत्वको सम्पत्ति छानबिन गर्न माग गरे। साथै, सहकारी, लघुवित्त र मिटरब्याजी पीडितहरूको आन्दोलनप्रति ऐक्यबद्धता जनाउँदै सत्ताधारीहरू जनताको आवाजप्रति संवेदनशील नरहेको टिप्पणी गरे।
भट्टले राज्यको ढुकुटी आफन्त र कार्यकर्ताको लाभका लागि प्रयोग गरिएको भन्दै असन्तुष्टि व्यक्त गरे। संगठनले देशभर भ्रष्टाचार, बेथिति र कुशासनविरुद्ध आन्दोलन छेड्ने तयारी गरिरहेको जनाएको छ।