मजदुर दिवसमा प्रचण्डको चेतावनी ः अधिकार नपाए संघर्ष चर्किन्छ

ईमधेश न्यूज सम्वाददता,
काठमाडौं, १८ वैशाख ।
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले अदालतले खारेज गरेको मजदुरको १०% सेवाशुल्क फिर्ता नपाए संघर्ष चर्किने चेतावनी दिएका छन्। काठमाडौंमा आयोजित १३६औँ अन्तर्राष्ट्रिय मजदुर दिवस कार्यक्रममा उनले मजदुरको अधिकार उल्ट्याउन खोजिएकोप्रति गम्भीर आपत्ति जनाए। प्रचण्डले प्रत्यक्ष निर्वाचित कार्यकारी प्रमुखको व्यवस्था आवश्यक रहेको पनि बताए।
कार्यक्रममा अखिल नेपाल ट्रेड यूनियन महासंघका नेता रामदिप आचार्य, अध्यक्ष जगत सिम्खडा, उपाध्यक्ष धनबहादुर विक र महासचिव सालिकराम काफ्लेले मजदुर अधिकारका विषयमा जोडदार आवाज उठाउँदै आन्दोलनका लागि आह्वान गरे। अन्तर्राष्ट्रिय श्रम संगठनका प्रतिनिधि नुमान ओक्यानले अन्तर्राष्ट्रिय समर्थनको आश्वासन दिए। हजारौं मजदुरले सेवाशुल्क फिर्ता, स्थायी नियुक्ति र पारिश्रमिक वृद्धिको माग गर्दै र्यालीमा भाग लिएका थिए।