मातातीर्थ औंसी : आमाप्रति श्रद्धा र सम्झनाको विशेष दिन

आज मातातीर्थ औंसी, अर्थात् आमाको मुख हेर्ने दिन, श्रद्धा र भक्ति भावसहित मनाइँदैछ। आमाप्रति सम्मान व्यक्त गर्ने यो विशेष दिनमा छोराछोरीहरूले आमालाई मिठा परिकार खुवाउने, उपहार दिने र आशीर्वाद लिने परम्परा छ।
आमालाई सम्झेर देवलोक, पितृलोक र पृथ्वीलोक जोड्ने सेतुका रूपमा यो दिनलाई लिइन्छ। आमाको निधन भइसकेकाहरूले दानपुण्य र श्राद्ध तर्पण गर्ने चलन छ।
यस अवसरमा काठमाडौंको थानकोट नजिक रहेको मातातीर्थमा विशेष मेला लाग्ने गर्दछ। जनश्रुति अनुसार, आमाको मृत्यु भइसकेका सन्तानले यहाँ स्नान गरी मृत आमाका नाममा भोजन चढाउने चलन बसेको हो।
नेवा समुदायले भक्तपुरको हनुमानघाटमा श्राद्ध तर्पण गर्ने परम्परा निभाउँछन्।
‘मातृदेवो भव’ भन्ने संस्कृत वाक्यांशले आमालाई देवताको स्थान दिएको छ। आमा नै हाम्रो पहिलो गुरु, रक्षक र जीवनको आधार भएकाले आजको दिन आमाप्रति कृतज्ञता प्रकट गर्ने अवसरका रूपमा लिइन्छ।