सप्तरीमा यात्रुबाहक बस दुर्घटना, दुईको मृत्यु र सात घाइते

लिलाकान्त यादव,
राजविराज, १४ वैशाख ।
 सप्तरी जिल्लाको कंचनरुप नगरपालिका–१० स्थित पूर्व–पश्चिम राजमार्गमा यात्रुबाहक बस दुर्घटना हुँदा दुईजनाको मृत्यु भएको छ भने सातजना घाइते भएका छन्। शुक्रबार दिउँसो करिब १२ बजे उदयपुरबाट विराटनगरतर्फ गइरहेको प्र१–०१–००१ ख ३४२० नम्बरको बस अनियन्त्रित भई पल्टिएको प्रहरीले जनाएको छ।
दुर्घटनामा परी एक पुरुष र एक महिलाको घटनास्थलमै मृत्यु भएको छ। मृतकहरूको सनाखत भइसकेको छैन। दुवैको शव गजेन्द्र नारायण सिंह अस्पताल, राजविराज पठाइएको छ।
दुर्घटनामा घाइते भएकामध्ये सुबेता दाहाल, मनोज भट्टराई, मिना भट्टराई, चेतना भट्टराई र कमला भुसालको अवस्था मध्यम रहेको छ भने अन्दाजी ७५ वर्षीय एक पुरुषको अवस्था गम्भीर रहेको छ। घाइतेहरूको धर्मेश्वर अस्पताल, गोल्डेन अस्पताल विराटनगर र नगर अस्पतालमा उपचार भइरहेको छ।
बस दुर्घटनापछि चालक फरार भएका छन्। प्रहरीले घटनास्थलमा पुगेर खोजतलास तथा अनुसन्धान थालेको जनाएको छ। प्रारम्भिक अनुसन्धानअनुसार बसको गति तीव्र रहेको र अनियन्त्रित भएर दुर्घटना भएको अनुमान गरिएको छ।