सप्तरीको रमपुरामा ट्याक्टर दुर्घटना, एक जनाको मृत्यु

लिलाकान्त यादव,
राजविराज, ११ बैशाख ।
 सप्तरीको हनुमाननगर कंकालिनी नगरपालिका–१४ रमपुरामा भएको ट्याक्टर दुर्घटनामा एक युवकको मृत्यु भएको छ भने अर्का एकजना घाइते भएका छन्।
बिहीबार बिहान करिब १०ः५० बजे पश्चिमबाट रामपुर आउँदै गरेको स.१.त ५०८३ नम्बरको ट्याक्टर माटो खन्ने क्रममा खाल्डोमा पल्टिँदा दुर्घटना भएको रमपुरा प्रहरी चौकीले जनाएको छ।
दुर्घटनामा परी देवनारायण यादवका २१ वर्षीय छोरा जिते यादवको राजविराजस्थित छिन्नमस्ता अस्पतालमा उपचारको क्रममा ११ः३५ बजे मृत्यु भएको हो।
उक्त दुर्घटनामा परी परियार यादवका २० वर्षीय छोरा दिपेश यादवको हातमा चोट लागेर अहिले स्थानीय मेडिकलमा उपचार भइरहेको प्रहरीले जनाएको छ।
घटनास्थलमा प्रहरी निरीक्षकको कमाण्डमा टोली खटिएको छ भने थप अनुसन्धानका लागि जिल्ला प्रहरी कार्यालय सप्तरीबाट अनुसन्धान टोली पठाइएको रामपुर प्रहरी चौकीले जानकारी दिएको छ।