शिक्षाको अधिकारमा अवरोध हुन नदिन आयोगको आग्रह

लिलाकान्त यादव,
राजविराजं, ०८ वैशाख ।
 नेपाल मानव अधिकार आयोगले शिक्षक आन्दोलनका कारण प्रभावित भइरहेका विद्यार्थीहरूको शिक्षाको अधिकार जोगाउन सरकार र शिक्षक महासंघ दुबै पक्षलाई वार्ता गर्न आग्रह गरेको छ।
अभिभावक संघ नेपालले आन्दोलनका कारण विद्यालय भर्ना, कक्षा १२ को परीक्षा र एसईई उत्तरपुस्तिका मूल्याङ्कन जस्ता महत्वपूर्ण शैक्षिक कार्यक्रम रोकिएको भन्दै आयोगको ध्यानाकर्षण गराएको थियो। सोही सन्दर्भमा आयोगले वैशाख ७ गते नेपाल सरकारलाई पत्राचार गरेको हो।
पत्रमा नेपालको संविधानको धारा ३१ र ३९ अन्तर्गत बालबालिकाको मौलिक हकको रक्षा गर्दै, विगतमा शिक्षक महासंघसँग भएको सम्झौता कार्यान्वयन गर्न र परीक्षा शान्तिपूर्ण ढंगले सञ्चालन हुने वातावरण बनाउने माग गरिएको छ।
आयोगका सहायक प्रवक्ता श्यामबाबु काफ्लेका अनुसार, समयमा समस्या समाधान हुन नसके करिब ५५ लाख विद्यार्थीको शिक्षामा दूरगामी मनोवैज्ञानिक असर, क्यालेण्डर अवरोध र शिक्षा प्रणालीमै नकारात्मक प्रभाव पर्ने खतरा रहेको छ।
आयोगले शिक्षाको अधिकार प्रचलनमा अवरोध हुन नदिन नेपाल सरकार र नेपाल शिक्षक महासंघलाई गम्भीर भएर वार्ता र समाधानको बाटोमा अघि बढ्न पुनः आग्रह गरेको छ।