सिरहामा जसपाको अधिवेशन, उपेन्द्र यादवको संघीयता र पहिचानमा जोड

ईमधेश न्यूज सम्वाददाता,
सिरहा, ०८ वैशाख ।
जनता समाजवादी पार्टी, नेपाल (जसपा) सिरहा जिल्ला कार्यसमितिको प्रथम जिल्ला अधिवेशन आइतबार गोलबजारस्थित फुलबारी रिसोर्टमा सुरु भएको छ।
अधिवेशनको उद्घाटन पार्टी अध्यक्ष उपेन्द्र यादवले गरेका थिए। उनले मधेसको पहिचान, अधिकार र आत्मनिर्णयको पक्षमा जसपाको ऐतिहासिक भूमिका रहेको बताउँदै, “जसपाले मधेसलाई राजनीतिक रूपमा सशक्त बनाएको छ,” भने।
जिल्ला अध्यक्ष अशोक कुमार यादवको अध्यक्षतामा सम्पन्न कार्यक्रममा माओवादी केन्द्रका नेता हरिनारायण चौधरी र नेकपा एमालेका नेता डा. नवीन कुमार यादव पनि सहभागी थिए।
डा. यादवले मधेस प्रदेशमा शिक्षा, कृषि र दक्ष जनशक्ति अभाव समाधान गर्न राज्य गम्भीर हुनुपर्ने बताए। छुवाछुतजस्ता सामाजिक विकृति अन्त्यका लागि नीतिगत हस्तक्षेप आवश्यक रहेको धारणा राखे।
कार्यक्रममा जसपाका नेताहरू राजलाल यादव, राजकिशोर यादव, सुरेश मण्डल, ललिता दास, जानकी यादव लगायतको सहभागिता थियो। स्वागत मन्तव्य राकेश रोशन गुप्ताले राखेका थिए भने मधेस गान प्रस्तुत गरिएको थियो।
संघीयता, समाजवाद र सामाजिक न्यायलाई मूल नाराका रूपमा अघि सारेको अधिवेशन नयाँ नेतृत्व चयन र नीति निर्माणका छलफलका साथ सम्पन्न हुनेछ ।