सप्तरीमा २० वर्षीया युवती मृत फेला, घाँसपातले छोपिएको अवस्थामा शव भेटियो

लिलाकान्त यादव, 
राजविराज, ०३ बैशाख ।
 सप्तरीको सुरुङ्गा नगरपालिका–७ हरिपुर टोलस्थित कुसुमलाल साहको पोखरी छेउमा एक २० वर्षीया युवतीको शव घाँसपातले छोपिएको अवस्थामा फेला परेको छ।
मृतक नागेन्द्र रामकी अविवाहित छोरी पूजा कुमारी राम हुन्, जो सोही स्थानमा बस्ने स्थायी बासिन्दा थिइन्। शव भेटिएको जानकारी प्राप्त भएलगत्तै प्रहरी चौकी धाँतीबाट प्रहरी निरीक्षकको कमाण्डमा टोली घटनास्थल पुगेर सुरक्षा व्यवस्था मिलाएको थियो।
घटनाको थप अनुसन्धानका लागि इलाका प्रहरी कार्यालय कडरबोना, जिल्ला प्रहरी कार्यालय सप्तरी र मधेश प्रदेश प्रहरी कार्यालयको केनाईन शाखा (म्इन् टोली) समेत घटनास्थलमा खटाइएको थियो।
प्रहरीका अनुसार, शव पोखरीको डिलमा घाँसपातले ढाकिएको अवस्थामा भेटिएपछि शंका लाग्दो परिस्थिति देखिएको छ। अनुसन्धानका लागि सबै पक्षबाट टोली परिचालन गरिएको छ।
बिहान १२ः३० बजे सूचना आएपछि सुरक्षाकर्मी घटनास्थलमा पुगेका थिए भने साँझ ५ः४५ बजे शव उठाई धरानस्थित बीपी कोइराला स्वास्थ्य विज्ञान प्रतिष्ठान (घोपा अस्पताल) पोष्टमार्टमका लागि पठाइएको प्रहरीले जनाएको छ।
घटनाको कारण खुल्न बाँकी रहेकाले विस्तृत अनुसन्धान जारी रहेको प्रहरीले जनाएको छ।