शिक्षक आन्दोलनमा समाजवादी विद्यार्थी युनियनको ऐक्यबद्धता

ईमधेश न्यूज सम्वाददाता,
काठमाडौं, ०३ बैशाख ।
 देशभर जारी शिक्षक आन्दोलनप्रति समाजवादी विद्यार्थी युनियन, नेपालले ऐक्यबद्धता जनाउँदै सरकारले शिक्षकका न्यायोचित माग अविलम्ब सम्बोधन गर्नुपर्ने माग गरेको छ।
संघीय लोकतान्त्रिक गणतन्त्र कायम भइसकेको अवस्थामा पनि शिक्षकहरूलाई सडक संघर्षमा उत्रिन बाध्य बनाउनु सरकारको असफलता भएको युनियनको भनाइ छ। उनीहरूले हालको शिक्षा प्रणाली अदूरदर्शी नीति, कमजोर व्यवस्थापन र स्पष्ट ऐन अभावका कारण दिशाहीन बन्दै गएको आरोप लगाएका छन्।
२०७८ माघ २० देखि सुरु भएको शिक्षक आन्दोलन अझ सशक्त बनाउन चैत्र २५ देखि शैक्षिक हडताल घोषणा गरिएसँगै विद्यार्थीहरू पनि समर्थनमा उत्रेका छन्।
युनियनले भनेको छ, “शिक्षकहरूको हकअधिकारको रक्षा विद्यार्थीको पनि जिम्मेवारी हो। यदि सरकारले बेवास्ता गरिरहेमा हामी शिष्यहरू पनि सडकमा उत्रन बाध्य हुनेछौं।”
युनियनले गुणस्तरीय र शिक्षक–विद्यार्थीमैत्री शिक्षा ऐन तत्काल ल्याइनुपर्ने माग गर्दै, सरकार र आन्दोलनरत पक्षबीच तत्काल संवाद र सहमति खोजिनुपर्नेमा जोड दिएको छ।