पूर्वविद्यार्थीसँगको सम्वन्ध बलियो बनाउन नेकमा भेला कार्यक्रम

ईमधेश न्यूज सम्वाददाता,
काठमाडौं, ०३ बैशाख ।
 नेपाल इन्जिनियरिङ कलेज (नेक)ले आफ्ना पूर्वविद्यार्थीहरूको विशेष जमघट ’नेक अल्मुनाई मिट’ कार्यक्रम यही वैशाख ६ गते आयोजना गर्ने भएको छ।
मुनाफारहित सामाजिक शैक्षिक संस्थाको रूपमा सञ्चालित कलेजले पूर्वविद्यार्थीबीच आपसी सम्बन्ध, सहकार्य र सम्झनालाई बलियो बनाउने उद्देश्यले कार्यक्रम आयोजना गर्न लागेको हो।
कलेजका मिडिया रिलेसन अफिसर तथा असिस्टेन्ट प्रोफेसर आशिष झाका अनुसार, कार्यक्रममा पेशागत अनुभव साटासाट, कलेज जीवनको स्मरण, र भविष्यमा सहकार्यका सम्भावनामाथि छलफल हुनेछ।
कार्यक्रम संयोजक आर्किटेक्ट पोषण थापाको नेतृत्वमा मूल समारोह समिति गठन गरिएको छ, जसमा विभिन्न पूर्वविद्यार्थी समावेश छन्।
कार्यक्रम नेक कलेजको सभाहलमा हुनेछ, जसमा सयौंको संख्यामा सहभागी हुने अपेक्षा गरिएको छ। कलेजले हालसम्म दशौं हजार दक्ष इन्जिनियर उत्पादन गरिसकेको छ।
सन् १९९४ मा स्थापना भएको यो कलेज पोखरा विश्वविद्यालय अन्तर्गतको सम्बन्धन प्राप्त संस्थान हो। नेपाल इन्जिनियरिङ परिषदबाट २०६० सालदेखि स्थायी अनुमति प्राप्त यस कलेजले इन्जिनियरिङका स्नातक र स्नातकोत्तर तहमा अध्ययन गराउँदै आएको छ।