सप्तरीमा मोटरसाइकल र टिपर ठोक्किँदा एक गम्भीर घाइते

लिलाकान्त यादव,
राजविराज, २६ चैत्र ।
 सप्तरीको कञ्चनरुप नगरपालिका–६ बलुवामा मोटरसाइकल र टिपर ठोक्किँदा एक जना युवक गम्भीर घाइते भएका छन्। दुर्घटना मंगलबार दिउँसो साइक्लिस्टलाई जोगाउने प्रयासमा भएको हो।
इलाका प्रहरी कार्यालय कञ्चनपुरका अनुसार फत्तेपुरबाट कञ्चनपुरतर्फ गइरहेको टिपर (प्र१–०२–००१ क ३९९८) र विपरित दिशाबाट आइरहेको मोटरसाइकल (प्र२–०१–००१ प ३५४४) साइक्लिस्टलाई जोगाउने क्रममा एकआपसमा ठोक्किएका थिए।
दुर्घटनामा सप्तकोशी नगरपालिका–९ का २५ वर्षीय धर्मराज मण्डल गम्भीर घाइते भएका छन्। उनको अनुहार र घुँडामा गहिरो चोट लागेको छ। प्रारम्भिक उपचारपछि उनलाई विराटनगरस्थित विराट नर्सिङ होममा रेफर गरिएको छ।
सवारी दुर्घटनापछि साइक्लिस्ट फरार भएका छन्। प्रहरीका अनुसार उनी हालसम्म पहिचान भइसकेका छैनन्।
टिपर चालक इनरुवा नगरपालिका–८ का २५ वर्षीय रमानन्द साहलाई प्रहरीले नियन्त्रणमा लिएको छ। दुर्घटनाबारे थप अनुसन्धान भइरहेको प्रहरीले जनाएको छ।