मधेसी नेता गजेन्द्र नारायण सिंहको ९७औं जन्मजयन्तीमा सालिकमा माल्यार्पण

लिलाकान्त यादव,
राजविराज, २४ चैत्र ।
नेपाल सरकारका महिला, बालबालिका तथा जेष्ठ नागरिक मन्त्री माननीय नवल किशोर साहले आइतवार रामनवमीको अवसर पारेर मधेसका मसिहा भनेर चिनिने स्व. गजेन्द्र नारायण सिंहको ९७औं जन्मजयन्तीका अवसरमा विभिन्न स्थानमा रहेका सालिकहरूमा माल्यार्पण गर्नुभयो।

सद्भावना पार्टीका संस्थापक अध्यक्ष समेत रहेका स्व. सिंहको योगदानको स्मरण गर्दै मन्त्री साहले सप्तरीको हनुमाननगर कंकालिनी नगरपालिका–१४ स्थित रामपुर, वडा नम्बर ४ मधवापुर चौराहा, र ढोडवा चौकमा रहेका सालिकहरूमा पुष्पमाला अर्पण गर्नुभएको हो।

कार्यक्रममा हनुमाननगर कंकालिनी नगरपालिकाका पूर्व मेयर सैलेश साह, स्थानीय नेता, सामाजिक अगुवा र सर्वसाधारणहरूको उपस्थिति रहेको थियो। सहभागी सबैले स्व. सिंहको मधेस आन्दोलनमा रहेको अग्रणी भूमिका र मधेसको अधिकार र पहिचानका लागि पु¥याएको योगदानको चर्चा गर्दै उहाँको दूरदर्शिता, संघर्षशीलता र लोकतान्त्रिक सोचलाई स्मरण गरे।
नेताहरूले सिंहको विचार र आदर्शलाई पछ्याउँदै मधेसमा सामाजिक न्याय, समानता र समावेशिताको स्थापनाका लागि अघि बढ्नुपर्ने आवश्यकता औंल्याए। कार्यक्रममा सहभागीहरुले स्व. सिंहप्रति श्रद्धा प्रकट गर्दै उहाँको योगदानलाई नयाँ पुस्तामा प्रवाह गर्नुपर्नेमा जोड दिएका थिए।
कार्यक्रम सौहार्दपूर्ण वातावरणमा सम्पन्न भएको थियो।