सत्य, मर्यादा र धर्मको उज्यालो पर्व रामनवमी 

                 रामनवमी हिन्दू धर्मावलम्बीहरूका लागि मात्र नभई सम्पूर्ण मानव जातिका लागि सत्य, धर्म र मर्यादाको प्रेरणादायी पर्व हो। त्रेतायुगमा भगवान् विष्णुको सातौँ अवतारका रूपमा अयोध्याका राजा दशरथका सुपुत्र श्रीरामको जन्म चैत्र शुक्ल नवमीका दिन भएको थियो। रामको जीवन दर्शनले समस्त मानव समुदायलाई सदाचार, संयम र आदर्श जीवनशैलीको मार्ग देखाउँछ।
श्रीराम केवल एक राजा होइनन्, उनी सत्यका पक्षपाती, धर्मका संरक्षक र मर्यादाका प्रतीक थिए। उनले परिवार, समाज र राष्ट्रप्रति कर्तव्यपालन गर्दै अनेक कठिनाइको सामना गरे। १४ वर्षको वनवास स्वीकार्नु, सीताको अग्निपरिक्षा, भ्रातृप्रेम र प्रजाप्रेम – यी सबैले रामलाई “मर्यादा पुरुषोत्तम“ को रूपमा स्थापित गर्छ।
रामनवमीको दिन हामी केवल मन्दिरमा पूजा, कीर्तन र भजनमा सीमित हुनु हुँदैन। आजको सन्दर्भमा रामको शिक्षालाई जीवनशैलीमा उतार्नु अझ महत्वपूर्ण छ। सत्य बोल्नु, कर्तव्य निर्वाह गर्नु, सहिष्णुता र सेवा भाव राख्नु नै आजको युगका राम भइने बाटो हो।
रामनवमीले हामीलाई आत्मचिन्तन, आत्मशुद्धि र आत्मबलको अभ्यास गर्न प्रेरित गर्छ। यो पर्वले सधैं सम्झाउँछ — अन्धकारमाथि उज्यालो, अधर्ममाथि धर्म, र अन्यायमाथि न्यायको विजय सम्भव छ।
जय श्रीराम१