समाजवादी विद्यार्थी युनियन नेपालको प्रथम राष्ट्रिय महाधिवेशन भैरहवामा सुरु

ईमधेश न्यूज सम्वाददाता
भैरहवा, २३ चैत ।
“शिक्षा, स्वास्थ्य र रोजगार विद्यार्थीको अधिकार, संघीय लोकतान्त्रिक गणतन्त्र हाम्रो आधार” भन्ने मूल नाराका साथ समाजवादी विद्यार्थी युनियन नेपालको प्रथम राष्ट्रिय महाधिवेशन शुक्रबार भैरहवामा सुरु भएको छ। महाधिवेशनको उद्घाटन जसपा नेपालका राष्ट्रिय अध्यक्ष तथा पूर्व उपप्रधानमन्त्री माननीय उपेन्द्र यादवले प्रमुख अतिथि रूपमा गर्नुभएको हो भने समाजवादी विद्यार्थी युनियन नेपालका केन्द्रिय अध्यक्ष रमेश कुमार यादवको अध्यक्षतामा कार्यक्रम सुरु भएको थियो।
उद्घाटन समारोहमा बोल्दै अध्यक्ष उपेन्द्र यादवले विद्यार्थीहरूलाई देशको भविष्यको रूपमा उल्लेख गर्दै राजनीतिक चेतना, नेतृत्व विकास र सामाजिक उत्तरदायित्वप्रति सचेत रहन प्रेरित गरे। उनले समावेशिता, समानता र न्याय स्थापनामा विद्यार्थी शक्ति अग्रणी बन्नुपर्ने धारणा राखे।
महाधिवेशनमा विभिन्न प्रदेशबाट आएका प्रतिनिधिहरूको उत्साहजनक सहभागिता रहेको थियो। यस अवसरमा संगठन सुदृढीकरण, नीति निर्माण, कार्ययोजना निर्माण तथा नयाँ नेतृत्व चयनबारे छलफल भएको हो।
कार्यक्रममा जसपा नेपालका केन्द्रीय नेताहरू, बुद्धिजीवी, शिक्षक, स्थानीय जनप्रतिनिधि र सर्वसाधारणको उल्लेखनीय उपस्थिति रहेको थियो। महाधिवेशनको २४ गते बन्द सत्र हुनेछ, जहाँ महाधिवेशनका मुख्य एजेन्डामा विस्तृत छलफल र निर्णय गरिने बताइएको छ।